Республикăри ял ĕçченĕсен ăмăртăвĕсенче пирĕн район команди - пĕрремĕш! Иртнĕ кану кунĕсенче Лапсар поселокĕнче пĕрремĕш хут республикăри яллă районсем хушшинчи хĕллехи спорт вăййисем пулмалли пирки пĕлтернĕччĕ. Районти культура çурчĕн коллективĕ хăнасене çăкăр-тăварпа кĕтсе илчĕ. Чăваш Республикин Министрсен Кабинечĕн Председателĕн пĕрремĕш çумĕ - ЧР ял хуçалăх министрĕ Михаил Игнатьев, ЧР çамрăксемпе ĕçлекен патшалăх комитечĕн çамрăксемпе ĕçлекен председателĕ Евгений Петров, республикăри физкультурăпа спорт министрĕн çумĕ Алексей Яковлев, пирĕн район администрацийĕн пуçлăхĕ Анатолий Князев вăййа хутшăнакансене саламласа çĕнтерỹсем сунчĕç. Пĕтĕмпе ăмăртăва яллă 20 район хутшăнчĕ. Йĕлтĕрпе чупассипе пĕрремĕш вырăна - Канаш районĕ, иккĕмĕшне - Вăрнарсем, виççĕмĕшне - Çĕрпỹсем йышăнчĕç. Шахмăтла вылянă чух телей пирĕн районтан пăрăнса иртмерĕ - Вăрнар, Муркаш шахматçисене хыçа хăварса пирĕн команда пĕрремĕш вырăна тухрĕ. Кỹкеç поселокĕнче нотариус пулса вăй хуракан Ольга Андреева, Ишлейри пысăк вольтлă аппаратура заводĕнче инструментальщикра тăрăшакан Александр Александров, Çĕньялти вăтам пĕлỹ паракан шкулти вĕрентекен Алевтина Патшина шахмат вăййин ăсталăхне лайăх пĕлнипех çакăн пек çитĕнỹ пулчĕ. Шашкăлла выляса Комсомольски, Етĕрне, Муркаш районĕсен командисем малти вырăнсене пайларĕç. Туслă çемьесен хушшинчи ăмăрту та питĕ çивĕч иртрĕ. 10-11 çулхи ача пур спорт çемйисен йышĕнче Çĕрпỹ районĕнчи Ивановсем, Хĕрлĕ Чутайри Дадюковсем, Канашри Ивановсем çĕнтерỹçĕсем пулса тăчĕç. 12-13 çулхи ачаллă çемьесенчен Шăмăршă районĕнчи Зыковсене, Хĕрлĕ Чутайри Элеменкинсене хыçа хăварса пирĕн районти Димитриевсен çемйи финиша пĕрремĕш çитрĕ. Янăш шкулĕнче физкультура учителĕнче вăй хуракан Вячеслав Димитриев çемйинче пурте спортпа туслă. Вăл Мамăшри вăтам пĕлỹ паракан шкулта директорта ĕçлекен Ирина мăшăрĕпе, çак шкултах 8-мĕш класра пĕлĕвне аталантаракан Татьяна хĕрĕпе пĕрре мар ăмăртусене хутшăнса çĕнтерсе пынă. Республикăри яллă районсем хушшинчи хĕллехи спорт вăййисен куçса çỹрекен кубокне 10,5 очко пухса пирĕн район команди илме тивĕçлĕ пулчĕ. Çĕрпỹ, Вăрнар, Муркаш районĕсен командисем 2-4-мĕш вырăнсене пайларĕç.