Февралĕн 2-мĕшĕнче Шупашкар район администрацийĕн лару залĕнче Тăван çĕршывăн аслă вăрçинче çĕнтернĕрĕнпе 65 çул çитнине уявлассине йĕркелекен комитет ларăвĕ иртрĕ. Унта вăрçă ветеранĕсем паянхи кун мĕнле пурăннине, вĕсен пурнăçне çăмăллатас тесе ирттерекен программăсене епле пурнăçланине пăхса тухрĕç, майăн 9-мĕшĕнче мĕн-мĕн ирттерессине планларĕç.
        Комитет ларăвне пухăннисене халăха социаллă хÿтлĕх паракан пай пуçлăхĕ А.Константинов вăрçă ветеранĕсене хваттерсемпе тивĕçтерес, çурт-йĕрне лайăхлатас ĕç мĕнле пыни çинчен каласа пачĕ, унпа çыхăннă йывăрлăхсем çинчен пĕлтерчĕ. Шупашкар районĕн вĕрентÿ управленийĕн пуçлăхĕ А.Смирнов шкул ачисем хушшинче патриотизм туйăмне аталантарас тĕллевпе иртнĕ çул мĕн-мĕн туса ирттернине, çывхарса килекен уява мĕнле хатĕрленнине пĕлтерчĕ. Çавăн пекех ларура районти кашни шкултах Тăван çĕршывăн аслă вăрçине халалланă кĕтессем йĕркелессине те сÿтсе яврĕç.
        Комитет ларăвне район администрацийĕн ĕçченĕсем, ял тăрăх пуçлăхĕсем, ветерансен канашĕсен ертÿçисем тата ыттисем хутшăнчĕç