Çĕнĕ ăмăртусем, çĕнĕ çитĕнÿсем

Çак кунсенче Вăрмар районĕнчи Кавалта шашкăлла выляс енĕпе йăлана кĕнĕ ăмăрту иртрĕ. Унта республикăри чи вăйлă шашистсем хутшăнчĕç. Сăмах май, асăннă ялтан спорт мастерĕсем виççĕн тухнă: Анатолий Фомин, Юрий Козырев, Николай Дмитриев.

Хĕрÿ кĕрешÿре Шупашкарти Геннадий Мочалов çĕнтерчĕ. Иккĕмĕшпе виççĕмĕш вырăнсене Юрий Владимировпа (Шупашкар) Михаил Ефимов (Кÿкеç) пайларĕç. Сывă пурнăç йĕркине сарас, çамрăк ăрăва шашка-шахматла выляма вĕрентес тĕллевпе Чăваш Республикин Шашка федерацийĕ районсенче час-часах ăмăртусем йĕркелет. Нумаях пулмасть çакнашкал ăмăрту Вăрнарта пулчĕ. Çитес вăхăтра Тăвайĕнче иртекен тупăшăва вара ачасене шашка-шахматла выляма хăнăхтарас ĕçре нумай çул вăй хунă Алексей Шишов 75 çул тултарнине халаллĕç. Шашка федерацийĕ Алексей Петровича çĕнĕ çитĕнÿсем тума çирĕп вăй-хал, ăнăçусем сунать.