Шупашкарта пурăнакан Алексей Зайцев вăрланăшăн маларах та судпа айăпланнă, анчах саккунсăр ĕç-хĕлтен çав-çавах ютшăнман иккен. Хальхинче квалификацине те ÿстерес тенĕ пулас - ултав çулĕ çине тăнă.

Суя документсемпе усă курса вăл Шупашкар районĕнчи Çатракасси ялĕнчи пĕр предприниматель складĕнчен кăнтăр кунĕнчех 5 тонна сахăр песукĕ тиесе тухнă - 174 пин тенкĕлĕх! Пылак груза Шупашкара илсе кайнă. Анчах складра улталаннине çийĕнчех сиснĕ те - тепĕр кунне Зайцев патне Шупашкар районĕн шалти ĕçсен пайĕн сотрудникĕсем пырса кĕнĕ.

Уголовлă ĕçпе айăплав пĕтĕмлетĕвне алă пуснă ĕнтĕ. Пылак тавара куç хывнă Зайцев суд пуласса кĕтет. Унăн груз турттарма усă курнă автомобилĕн, вăл вăрланă 100 михĕ сахăрăн шăпине те суд татса парĕ.